MLA MONIKA RAJALE : शेअर मार्केट ट्रेडींग मध्ये नागरीकांची फसवणूक, आ. राजळे यांची पोलीस अधीक्षकांकडे चौकशीची मागणी

अहमदनगर (प्रतिनिधी) – शेवगांव तालुक्यातील शेअर मार्केट ट्रेडींग मध्ये नागरीकांच्या झालेल्या फसवणूकीची सखोल चौकशी करून संबंधित कंपन्या एजंट यांच्यावर गुन्हे दाखल करावेत, सर्वसामान्यांना पैसे मिळवून देऊन न्याय द्यावा अन्यथा विधानसभेत आवाज उठवावा लागेल अशी मागणी वजा इशारा (MLA MONIKA RAJALE) आमदार मोनिकाताई राजळे यांनी जिल्हा पोलीस अधीक्षक राकेश ओला यांना दिला आहे.

शेवगाव तालुक्यात अनेक बोगस शेअर मार्केट कंपन्यानी आणि त्यांच्या एजंटांनी जास्तीचा परतावा देण्याचे आमिष दाखवून नागरिकांची, शेतकऱ्यांची, व्यापारी यांची फसवणूक करून काही तथाकथित कंपन्या, त्यांचे एजंट फरार झाले आहेत, त्यांच्यावर कारवाई करावी यासाठी आ. मोनिकाताई राजळे यांनी अहमदनगर येथे पोलीस अधीक्षक राकेश ओला याना निवेदन दिले. यावेळी पंचायत समिती सदस्य विष्णुपंत अकोलकर, पाथर्डी मार्केट कमिटीचे सभापती सुभाष बर्डे व जमीर आतार यावेळी उपस्थीत होते.

आ. राजळे यांनी निवेदनात म्हटले आहे कि, मागील गेल्या एक ते दिड वर्षापासून शहरी व ग्रामीण भागातही बोगस शेअर मार्केट ट्रेडींग कंपन्‍या मार्फत शेअर मार्केट ट्रेडींग मध्ये पैसे गुंतवणाऱ्यांना मोठया प्रमाणात व्याज परतावा देण्याचे आमिष दाखविले गेले. बँका, पतसंस्था यापेक्षा जास्त किंवा भरमसाठ परतावा मिळेल या आश्वासनांना बळी पडून हजारो नागरीकांनी या शेअर मार्केट ट्रेडींग कंपन्‍यांकडे कोटयावधी रुपयांची गुंतवणुक केली आहे. शेवगांव तालुक्यात अशा सुमारे 10, 12 बोगस शेअर मार्केट ट्रेडींग कंपन्‍या या परिसरात आपल्या एजंट मार्फत लोकांना गुंतवणुक करावयास लावत होत्या, या शेअर मार्केट ट्रेडींग कंपन्‍यात हजारो लोकांनी कोटयावधी रुपये गुंतवणूक केली आहे, या फसवणूक झालेल्या लोकांना न्याय मिळवून द्यावा असे राजळे यांनी म्हटले आहे.

… हे विकून गुंतवणूक
कुणी शेती गहाण ठेवून, कुणी दागिने गहाण ठेवून, कुणी बचत गटातून पैसे उचलून, कुणी आपली गाय, बैल, शेळया जनावरे विकून पैसे ऊभे केले व या शेअर मार्केट ट्रेडींग मध्ये गुंतविले आहेत.

अन्यथा विधानसभेत आवाज उठवणार : राजळे
तसेच तालुक्यातील सर्वसामान्य नागरीक, गोरगरीब, महीला, माता भगिनी, मजूर यांना न्‍याय मिळवून देण्यासाठी या परिसरातील शेअर मार्केट ट्रेडींग कंपन्‍या चालक, एजंट, यांचेवर गुन्हे दाखल होवून, तात्काळ योग्य तपास करून या आरोपींच्या मालमत्ता जप्त होवून गुंतवणूकदारांना त्यांचे पैसे परत मिळवून देण्यासाठी जिल्हा पोलीस अधिक्षक, कार्यालयाने पुढाकार घेवून योग्य तपास करून न्‍याय मिळवून द्यावा. या शेअर मार्केट ट्रेडींग कंपन्‍या व एजंट विरोधात योग्य कारवाई न झाल्यास, विधानसभेत आवाज उठवून जनतेला न्याय देऊ असे आमदार मोनिकाताई राजळे यांनी म्हटले आहे.