राहुरीत कर्डिलेंचा डाव; विखेंचा पत्ता कट, तनपुरेंचे टेन्शन वाढणार !

अहमदनगर (प्रतिनिधी) – महाराष्ट्र राज्यात आता लवकरच विधानसभेचे पडघम वाजायला सुरु होणार आहेत. त्यापूर्वीच राहुरी-नगर-पाथर्डी विधानसभा मतदारसंघातून भाजपचे माजी मंत्री शिवाजी कर्डिले हे निवडणुकीच्या रिंगणात उतरणार आहेत. तास दावाच त्यांनी केला आहे. त्यामुळे आता राहुरी विधानसभेची लढत रंगतदार होणार असल्याचे दिसत आहे. मात्र माजी खा. सुजय विखे यांनी राहुरी किंवा संगमनेर मतदारसंघातून निवडणूक लढवणार असल्याचे म्हटले होते. त्यामुळे विखे यांचा पत्ता कट करत कर्डीले यांनी निवडणूक लढवण्यावर ठाम आहेत. तर दुसरीकडे माजी मंत्री आमदार प्राजक्त तनपुरे यांचे टेन्शन वाढणार आहे.

राहुरी मतदारसंघातून गेल्या २०१९ च्या विधानसभा निवडणुकीत माजी आमदार शिवाजी कर्डिले यांचा दारुण पराभव झाला होता. राष्ट्रवादीचे माजी मंत्री आमदार प्राजक्त तनपुरे यांनी श्री. कर्डिले यांचा पराभव केला होता. आता या पराभवाचा वचपा काढण्यासाठी शिवाजीराव कर्डिले यांनी यंदाची निवडणूक लढवण्याचा निर्णय घेतला आहे. याच पार्श्वभूमीवर शिवाजी कर्डिले यांनी प्रसारमाध्यमांशी संवाद साधला. राहुरी-नगर-पाथर्डी विधानसभा मतदारसंघातील जनतेनेच मला राहुरीतून निवडणूक लढवण्याचा आग्रह धरला आहे. त्यामुळे मी या मतदारसंघातून निवडणूक लढवणार आहे, असे शिवाजी कर्डिले यांनी म्हटले आहे. तसेच अनेक कार्यकर्ते, नेते यांनी देखील तास आग्रह धरला असल्याचे म्हटले आहे. त्यामुळे आता येत्या विधानसभा निवडणुकीत राहुरी विधानसभा मतदारसंघातून भाजप नेते शिवाजी कर्डिले विरुद्ध राष्ट्रवादीचे आमदार प्राजक्त तनपुरे यांच्यात लढत होणार आहे.

विखेंचा पत्ता कट, कर्डिलेंचा राहुरीवर दावा
माजी खा. सुजय विखे यांनी लोकसभेत पराभव झाल्यानंतर आपण राहुरी किंवा संगमनेर मतदारसंघातून निवडणूक लढवणार असल्याचे विधान केले होते. तसे प्रयत्नही त्यांच्याकडून केले जात होते. त्यामुळे माजी मंत्री शिवाजीराव कर्डीले हे श्रीगोंदा मतदारसंघातून निवडणूक लढवणार असल्याचे म्हटले जात होते. दरम्यान कर्डीले यांच्याकडून तशी चाचपणी देखील करण्यास सुरुवात केली होती. मात्र काही दिवसांपूर्वी विखे यांनी आपण संगमनेर विधानसभा मतदारसंघातून निवडणूक लढण्यास इच्छुक असल्याचे म्हटले होते. त्यामुळे कि, काय शिवाजीराव कर्डीले यांनी राहुरी विधानसभा मतदारसंघावर दावा ठोकून आपणच भाजपाकडून निवडणूक लढवणार असल्याचे अप्रत्यक्षपणे म्हटले आहे. तसे त्यांनी म्हटले देखील आहे.