"लंके"चा उमेदवारी अर्ज भरण्यासाठी राहुल गांधी येणार

जनसंवाद यात्रेची उद्या सांगता : पवार, ठाकरे, थोरात राहणार उपस्थित

Nilesh Lanke (अहमदनगर) – नगर लोकसभा मतदारसंघात भाजपकडून खा. डॉ. सुजय विखे पाटील यांना उमेदवारी देण्यात अली आहे. तर त्यांच्या विरोधात राष्ट्रवादी काँग्रेस शरदचंद्र पवार गटाकडून माजी आमदार निलेश लंके यांना निवडणुकीच्या रिंगणात उतरवण्यात आले आहे. डॉ. विखे विरुद्ध लंके यांच्यात होणाऱ्या या चुरशीच्या लढतीकडे जिल्ह्यासह राज्याचे लक्ष लागले आहे. निलेश लंके यांचा उमेदवारी अर्ज भरण्यासाठी खुद्द काँग्रेस नेते राहुल गांधी येणार असल्याचे लंके यांनी सांगितले.

नगर शहरात लंके यांच्या संवाद यात्रेचे आयोजन करण्यात आले होते, त्यादरम्यान ते बोलत होते. राज्यात लोकसभा निवडणुकीसाठी एकूण पाच टप्प्यात मतदान होणार आहे. अहमदनगर लोकसभा मतदारसंघासाठी चौथ्या टप्प्यात 13 मे रोजी मतदान होईल. तर उमेदवारी अर्ज भरण्यासाठी सुरुवात झाली असून 25 एप्रिलपर्यंत उमेदवारी अर्ज दाखल करण्यात येणार आहेत. या पार्श्वभूमीवर महाविकास आघाडीचे उमेदवार निलेश लंके यांनी आपला उमेदवारी अर्ज भरण्यासाठी काँग्रेस नेते राहुल गांधी हे उपस्थित राहतील अशी माहिती दिली आहे.

अर्ज भरण्यासाठी राहुल गांधी येणार
उमेदवारी अर्ज भरण्यासाठी तारीख निश्चित करण्यात आलेली नाही. मात्र, अर्ज भरण्यासाठी काँग्रेस पक्षाचे नेते राहुल गांधी येणार आहेत. त्यांच्याशी माझं कालच बोलणं झाल असून लवकरच अर्ज भरण्याची तारीख जाहीर करू असे, निलेश लंके यांनी म्हटले आहे.

जनसंवाद यात्रेची उद्या सांगता : पवार, ठाकरे, थोरात राहणार उपस्थित
निलेश लंके यांच्या मतदार संघातील स्वाभिमानी जनसंवाद यात्रेची उद्या सांगता होणार आहे. यावेळी राष्ट्रवादी काँग्रेस पक्षाचे अध्यक्ष (शरदचंद्र पवार गट) शरद पवार, शिवसेनेचे आदित्य ठाकरे, तसेच माजी महसूल मंत्री बाळासाहेब थोरात हे उपस्थित राहणार आहेत. दरम्यान या यात्रेची सांगता सभा गांधी मैदान येथे होणार आहे.