पेन्शनर्ससाठी नवे ऑनलाईन पोर्टल; आताबँकेतील चकरा वाचणार

पेन्शनर्स पोर्टल news – देशभरातील पेन्शनर्ससाठी आनंदाची बातमी असून यापुढे आता बँकेच्या चकरा माराव्या लागणार नाहीत, केंद्र सरकारने स्टेट बॅंक ऑफ इंडियासोबत मिळून पेन्शनर्ससाठी नवे ऑनलाईन पोर्टल सुरु केले आहे. “एकीकृत पेन्शनर पोर्टल” असे या पोर्टलचे नाव आहे. या पोर्टलद्वारे 5 बॅंकांची पेन्शन प्रोसेस आणि पेमेंट सर्व्हिस एकाच ठिकाणी मिळणार आहे. पेन्शन सेवा डिजिटल करुन पेन्शनर्सचे आयुष्य सुलभ करण्याचा प्रयत्न सरकारचा आहे. पेन्शन आणि पेन्शनर्स कल्याण विभागाकडून याबद्दलची माहीती देण्यात आली आहे.

दरम्यान ही सुविधा सुरु झाल्यानंतर 5 बॅंकांशी संबंधित पेन्शनर्सना आपल्या महत्वाच्या कामांसाठी दरवेळेस बॅंकेत जाण्याची गरज भासणार नाही. यामध्ये पेन्शनची पावती, लाइफ सर्टिफिकेट जमा करणे, मिळालेल्या किंवा भरलेल्या पैशांची नोंद तसेच फॉर्म 16 या सुविधा या पोर्टलवर मिळणार आहेत. पेन्शनर्स या पोर्टलच्या माध्यमातून आपली मासिक पेन्शनची नोंद पाहू शकतात. तसेच सर्वच निगडित सुविधा यामध्ये देण्यात आल्या आहेत.

एसबीआय, बॅंक ऑफ बडोदा, पंजाब नॅशनल बॅंक.कॅनरा बॅंक या बँकांचे पेन्शनर्स या पोर्टलच्या सुविधेचा लाभ घेऊ शकतात. तसेच यासोबतच इतरही बँक यासोबत जोडल्या जाऊ शकतील असे म्हटले जात आहे.

सरकारकडून निवृत्ती धारकांना लाइफ सर्टिफिकेट सोबतच ‘भविष्य’ पोर्टलची सुविधादेखील मिळणार आहे. भविष्य पोर्टल हे इंटीग्रेटेड पेन्शनर पोर्टलचा मुख्य भाग आहे. सुरुवातीपासून शेवटपर्यंत पेन्शनची प्रक्रिया आणि पेमेंट डिजिटल बनवणे हे याचे उद्दीष्ट आहे. यामध्ये रिटायर्ट होणाऱ्या कर्मचाऱ्याला आपले दस्तावेज ऑनलाईन जमा करणे, इलेक्ट्रॉनिक फॉर्मेटमध्ये पेन्शन पेमेंट ते डिजिलॉकरमध्ये पाठवण्याची सुविधा याअंतर्गत मिळेल. पेन्शन प्रक्रिया आणि पेमेंट यंत्रणा डिजिटल बनवण्यासाठी वेब पोर्टल तयार करण्यात आले आहे.