आरटीई प्रवेशास उद्यापासून सुरुवात; शासनाच्या निर्णयास न्यायालयाची स्थगिती

RTE ADMISSION 2024 – राज्य शासनाने आरटीई मध्ये काही प्रमाणात बदल केल्याने पालकांमध्ये मोठा गोंधळ उडाला होता, तर पालकांनी शासनाच्या या निर्णयाविरोधात न्यायालयात गेले होते. त्यामुळे शिक्षण हक्क कायद्यातंर्गत (आरटीई) देण्यात येणारी प्रवेश प्रक्रिया रखडली होती. उच्च न्यायालयाने शासनाच्या सुधारीत आदेशाला स्थगिती दिली आहे. त्यामुळे आता आरटीई प्रवेश प्रक्रियेला नव्याने सुरुवात होणार आहे. पालकांना १७ मे उद्या पासून आरटीईसाठी अर्ज करता येणार आहे. अर्ज भरलेल्या पालकांनीही नव्याने आपल्या पाल्यांचा अर्ज भरावा लागणार आहे. दरम्यान शालेय शिक्षण विभागाने यंदा महत्त्वपूर्ण बदल केला होता. या बदलानुसार खासगी शाळेत प्रवेशाला विद्यार्थी मुकणार होते. मात्र आता प्रवेशाची वाट मोकळी झाली आहे.

तर त्यांनाही पुनःप्रवेश नोंदणी करावी लागणार
आरटीई प्रवेश प्रक्रियेसाठी इंग्रजी माध्यमांच्या शाळेत एक लाखांवर जागा उपलब्ध आहेत. आता आरटीई २४ टक्के राखीव जागांसाठी नवीन प्रवेश प्रक्रिया १७ मे शुक्रवारपासून सुरु होणार आहे. त्यासाठी विद्यार्थ्यांना ऑनलाईन पद्धतीने नोंदणी करावी लागणार आहे. ज्या पालकांनी त्यांच्या पाल्यांची यापूर्वी आरटीई प्रवेशासाठी नोंदणी केली आहे, त्यांनाही पुन्हा नोंदणी करावी लागणार आहे.

शिक्षणातील भेदभाव संपणार
विद्यार्थ्याच्या निवासस्थानापासून एक किलोमीटर परिसरात अनुदानित शाळा, शासकीय शाळा, स्थानिक स्वराज्य संस्थेच्या शाळा असल्यास त्याच शाळेत प्रवेश देण्यात येणार आहे. खासगी शाळेत प्रवेश देण्यात येणार नाही. या बदलास पालकांनी उच्च न्यायालयात आव्हान दिले होते. न्यायालयाने शासनाने केलेल्या या बदलास स्थगिती दिली. शासनाच्या नवीन नियमांमुळे सर्वसामान्य मुलांनी इंग्रजी माध्यमांच्या खासगी शाळेची वाट बिकट झाली होती. श्रीमंत मुलांसाठी इंग्रजी माध्यमांची खासगी शाळा तर गरीब मुलांसाठी शासकीय शाळा अशी वर्गवारी यामुळे झाली असती. मात्र उच्च न्यायालयाने शासनाचा हा निर्णय रद्द केला आहे. त्यामुळे सर्वाना सामान न्याय या मार्गाने उद्यापासून पुन्हा प्रवेश प्रक्रिया सुरु होणार आहे. त्यामुळे जे पालक शासनाच्या या निर्णयाविरोधात गेले होते त्यांचे सर्व स्तरातून कौतुक होत आहे.