लंके यांचे समर्थक राहुल झावरे याच्यावर हल्ला

अहमदनगर (प्रतिनिधी) – लोकसभा निवडणूक पार पडली आहे. अटीतटीच्या लढतीत मात्र नगर मतदार संघात राष्ट्रवादी काँग्रेस शरदचंद्र पवार पक्षाचे उमेदवार निलेश लंके यांनी विजय मिळवला. महसूल मंत्री तथा पालकमंत्री राधाकृष्ण विखे पाटील यांचे सुपुत्र आणि विद्यमान खासदार सुजय विखे पाटील यांचा लंके यांनी पराभव केला. या विजयानंतर पारनेर तालुक्यात राजकीय वातावरण पेटले असून दोघांचे समर्थक आमनेसामने आले आहेत. लंके यांचे समर्थक राहुल झावरे यांच्यावर हल्ला झाला आहे. यामुळे एकच खळबळ उडाली आहे.

लोकसभा निवडणुकांनंतर पारनेर तालुक्यात मोठ्या प्रमाणात गटातटाचे राजकारण सुरू झाले आहे. लंके यांच्या विजयानंतर भाजप आणि राष्ट्रवादीचे कार्यकर्ते आमनेसामने आले आहेत. लंके यांचे समर्थक राहुल झावरे यांच्या गाडीवर पारनेर बस स्थानकाजवळ हल्ला झाला. या हल्ल्यात गाडीचे मोठे नुकसान झाले असून सुदैवाने त्यांना जास्त इजा झलेली नाही. मात्र झावरे हे हॉस्पिटल मध्ये दाखल झाले असल्याचे म्हटले जातेय

या घटनेची माहिती मिळाल्यानंतर लंके समर्थक घटनास्थळी जमा झाले असून कोणताही अनुचित प्रकार घडू नये यासाठी पोलिसांचा मोठा फौजफाटा तैनात करण्यात आला आहे. परंतु या राजकीय संघर्षामुळे सामान्यांचे हाल होत आहे.